සිත්ති නෝනා  

Posted by නලිනි චන්දිමා in , ,



සිත්ති නෝනා
බලාපන්
මොහොමඩ් ඇවිත්

පුත්තලමේ සිට
මග ගෙවාගෙන
අත් වැඩට නොගිහින් අද
නුඹ බැලීමට ඇවිත්

නුඹේ සිහිසුන් සිරුර
වැලඳගෙන, සිප දෙපා,
වියළි කෙහෙ කැරලි
පිරිමදියි සෙනෙහසින්

නුඹේ නෑසෙන කණට
කිට්ටු වී මුමුණයි
ගෙවුණු විසි වසර තුළ
කියා ගත නුහුණු දේ

නුඹේ දරු සයදෙනට
කන්ට දිය යුතු හෙයින්
නොහැක හෙට මෙහි එන්ට
නුඹ බලන විලසින්


යා යුතුය බොහෝ දුර
තනිව, දරුවන් පිණිස
ඒ නිසා යනු මිසෙක
නුඹව හැර යනු නොවේ

සිත්ති නෝනා
විවර කර දෑස
සමුදෙන් මොහොමඩ්ට
අවසාන වරට


සයවන දරුවා ලබා සති දෙකකින් හදිසියේ අසනීපව, පුත්තලමෙන් කොළඹට එවා, කොළඹින් අපට එවූ සිත්ති නෝනා.... උපන් දා සිට දුක් විඳි ඇගේ පෙණුම තිස් හතක් නොව පනස් හතක් මෙනි. ජීවිතයත් මරණයත් අතර දෝලනය වන ඈ බොහෝවිට ආපසු නිවෙසට නොයනු ඇත.
විසි වසරක් පුරා ඈ හා ජීවිතය බෙදාගත් මොහොමඩ්ගේ කඳුලින් අද ඇගේ සිරුර නෑවෙන්නට ඇති.
"මම හෙට වැඩට ගියොත් තමා කන්ඩ හම්බ වෙන්නෙ." දරුවා ලැබුණු පසු දින එකොළහක්ම රැකියාවට නොගොස් සිටි ඔහු අතේ සතයක්වත් ඉතිරි නැතිව ඇති. මග වියදම් සපයා ගැනීම තබා අලුත උපන් දරුවා ඇතුලුව දරු කැලකගේ කුසගිනි නිවන්නේ කොහොමද? සිත්ති නෝනා අසාධ්‍ය තත්වයෙන් සිටියදීත් ඔහුට මේසන් වැඩට අත් උදවු දීමට යාමට සිදුව ඇත්තේ ඒ නිසා. "මම හෙට ආවෙ නැතුවට කමක් නැද්ද?" ඔහු දොර ළඟ සිට ආයෙමත් ඇහුවා. "ළමයිනුත් හුඟක්නෙ. මම වැඩ කරොත් තමා කන්ඩ හම්බවෙන්නෙ....මම ආයෙ සැරයක් එයාව බලලා එන්ඩද?" සිත්ති නෝනාව තනිකර ආපසු යන මොහොමඩ්ගේ හදවත රිදුම් දෙන්නට ඇති.
ඒත්...... මෙතරම් ආදරය කරන මොහොමඩ්ව යළි දකින්නට නොලැබෙන බව නොදැනදෝ සිත්ති නෝනා තද නින්දක.




This entry was posted on Monday, May 09, 2011 at Monday, May 09, 2011 and is filed under , , . You can follow any responses to this entry through the comments feed .

6 දෙනෙක් ගේ අදහස්

බොහෝම සංවේදී පදපෙලක්, හරිම කණගාටුදායක තාත්වික සිතුවමක් මතුවුනා කියවද්දි. ඒත් සමඟම ඇති වූයේ එක්තරා විදියක කලකීරීමක් - ඒ ගැන විස්තර නොලියාම යමි.

May 9, 2011 at 9:12 PM

අය්යගෙ සටහනට බොහොම ස්තුතියි. මොහොමඩ් සිත්ති නෝනව බලන්න ආ මොහොතේ පටන් දරා ගන්න අපහසු හැඟීමක් ඇති වුණා.

May 9, 2011 at 9:38 PM

අනේ හරිම කනගාටු දායක සිදුවීමක් නංගි. අත්දැකීමක්ද? කියලත් හිතුන. මට හිතා ගන්නබැහැ මේකට ලියන්නෙ මොනවද? කියල. කොහොම මේව විඳගන්න ඇතිද? හරිම තාත්විකව ලියල තියෙනව කියල නම් කියන්නම ඕනෙ. ඔයාට ජයම පතනවා.

May 10, 2011 at 7:31 PM

@Chandi ඔව්, අක්කා, මේ දිනවල ඉන්න රෝගියෙක්.
බොහොම ස්තුතියි සටහනට.

May 11, 2011 at 11:05 PM

සිත්ති නෝනාට මොකද වුනේ?

June 7, 2011 at 1:35 PM

@ RanDil: සිත්ති නෝනා සිහිය නැතිව වුවත්, තවත් දින තුනක් අපේ දැඩි සත්කාර ඒකකයේ හිටියා. මොහොමඩ් තවත් වරක් ඇයව බලන්නත් ආවා. ඉන් පසු ඇයව කොළඹ රෝහලට මාරු කර හැරියා වැඩි දුර ප්‍රතිකාරවලට. මාරු කර යැවු දිනට පසු දින ඇයගෙ තත්ත්වය තවත් අසාධ්‍ය වී තිබුණා. එතනින් එහාට විස්තර අහන්න මට හිතුණෙ නෑ.

June 7, 2011 at 3:58 PM

Post a Comment

ඔබේ අදහස් අපිට ශක්තියක්